Lojërat Super Mario rikthehen përsëri dhe kësaj here me Mario Party Superstar e cila na sjell një larmishmëri të madhe mini lojërash në formën e lojës "Mos u Nxeh" nga gjenerata të ndryshme të Nintendo. Edhe pse është një party game, sa argëtuese është Mario Party Superstars dhe cfarë na sjell kjo lojë, ngelet për tu parë në këtë GameON Review?

Nëse jeni një lojtar i cili i ka provuar seritë e mëparshme të Mario Party, atëherë Superstars ju kthen në të kaluarën me pesë tabela klasike dhe një numër tepër të madh mini-lojërash për të luajtur nga Nintendo 64, Gamecube dhe më shumë. Për ata që nuk ia ka rënë rasti ta provojnë ose njohin, Mario Party është një lojë turn-based e ngjashme me stilin e lojës "Mos u Nxeh" që pothuajse të gjithë ju e njihni.

Në Mario Party, katër lojtarë garojnë kundër njëri tjetrit për të mbledhur sa më shumë monedha dhe stars duke konkurruar në mini lojëra ose vendet e ndryshme të tabelës që iu japin shpërblime, qoftë për mirë ose për keq.

Pasi nisni lojën ju do të zgjidhni karakteret që dëshironi t'iu përfaqësojë si Mario, Luigi, Wario, Yoshi, Peach, Rosalina dhe më shumë. Gjithashtu ju mund të ndryshoni vështirësinë e lojës, ndihmat gjatë mini lojërave, sa turne doni që loja të zgjas dhe gjithashtu të shtoni A.I për të luajtur kundër jush. Sa herë që të nisni lojën ju do të pyeteni nëse jeni të familjarizuar me lojërat Mario Party duke iu ofruar një shpjegim të mirë sa herë jeni të paqartë.

Një ndër problematikat kryesore e cila mund të shihet, është se asgjë nuk është e parashikuar dhe çdo gjë është e mundur që të ndodh. Këto fillojnë që prej hedhjes së zarit ku mund t'iu bjerë një numër që iu prish punë dhe deri tek kurthet që kundërshtarët tuaj kanë ngritur kundër jush duke iu bërë që të humbni monedha ose yje. Por gjithashtu këto gjëra mund t'iu japin një avantazh të madh.

Fatmirësisht një pjesë e madhe mini-games bazohen në aftësitë tuaja për ta kuptuar dhe mësuar shpejt se si luhet Mario Party. Loja do t'iu zgjedhë në mënyrë rastësore një ndër afërsisht 100 mini lojërat e ndryshme që Mario Party Superstars ka. Ato variojnë që prej atyre ku secili luan për vete deri tek ato 2v2 ose 1v3 duke e rritur larmishmërinë e lojës.

Dhe kjo lojë nuk ka një finish, ju do të rrotulloheni rreth e rrotull hartës me qëllimin për të mbledhur sa më shumë monedha dhe yje derisa turnetë të mbarojnë. Dhe nëse keni ngelur mbrapa ose nuk keni patur fat, loja përpiqet që t'iu "ndihmojë" duke rritur shpërblimet ose ndëshkimet. Gjithashtu në fund të lojës, lojtarët që kanë fituar më shumë në mini lojëra, kanë pësuar më shumë ndëshkime dhe më shumë do të shpërblehen me yje.

Shumë njerëzve nuk u pëlqen ky aspekt i Mario Party, por mendoj se e bën atë perfekt. Ky element iu vendos në tension deri në fund të lojës duke e shtuar akoma edhe më shumë argëtimin tuaj.

Grafikat janë goxha të mira duke marrë parasysh që po e luani në Nintendo Switch dhe sidomos nëse e keni të lidhur me një TV. Problemi që hasëm ishte fakti se nëse po e luani lojën në një TV 32", gameplay do të duket sikur e keni bërë zoom.

Ndër problemet kryesoret që hasëm ishte menuja e ngatërruar dhe pak e çuditshme dhe skenat kinematike të cilat ndihen goxha të ngadalta; shumicën e kohës duke ulur tensionin dhe emocionet që krijohen. Dhe nëse po luani me A.I, ai është shpesh herë i destinuar për t'iu prishur punë dhe duket sikur qëllimi i tij i vetëm është që t'iu shkaktojë probleme.

Gjithashtu ndonjëherë muzika ishte e bezdisshme në varësi të mini lojërave që binin por shumicën e kohës ishte okay dhe përshtatet me situatën ose mini lojën që binte.

Për ta përmbledhur, Mario Party Superstars është një lojë e shkëlqyer për t'u luajtur me miqtë tuaj duke iu emocionuar shpesh. Por problemet si pamundësia për ta parashikuar, shpërblimet dhe ndëshkimet dhe më shumë ia ulin argëtimin duke iu bërë shpesh herë që të humbni interesin. Gjithashtu iu rekomandojmë ta luani me miq për një eksperiencë më të mirë ose të provoni mini lojërat e ndryshme që loja ka të cilat janë goxha argëtuese.

 https://www.youtube.com/watch?v=-7945YeCJh4&t=5s